(Infobae) – Por lo menos 987 persona a perde nan bida pa via di dengue na Brazil, un 301% mas cu na 2021 y e number mas halto registra den un aña na a e pais, segun fuentenan oficial a informa diamars ultimo.
E cifra di mortonan registra ta cuater biaha superior na esun di 2021, ora a reporta 246 fayecido pa e malesa aki cu ta wordo transmiti pa e picadura di e sangura Aedes aegypti.
Segun e ultimo rapport epidemiologico di Ministerio di Salud, e number di mortonan pa dengue na e pais por ta superior, ya cu otro 631 caso ta bao investigacion di autoridadnan sanitario.
Na esey ta suma 14 dia cu ta falta pa analisa, ya cu e documento ta tuma na cuenta e casonan cu a sucede te siman 50 (17 di december).
E datonan ta señala cu durante e periodo a wordo confirma 1.433 caso grave y otro 17.760 a wordo identifica como casonan di dengue “cu señal di alarma.”
Estadonan cu mayor number di fayecido pa e malesa ta Sao Paulo, cu 278 muertes; Goiás (154); Paraná (108); Santa Catarina (88), y Río Grande do Sul (66). Ta trata di e cifra mas halto na e pais for di 2015, ora 986 persona a muri pa via di dengue na e pais sur Americano.
Segun Ministerio di Salud, e aña aki a registra 1.4 miyon caso di dengue na Brazil, un aumento di 163.8% compara cu aña 2021.
Brasilia cu mas di 68.600 persona infecta, ta e ciudad na unda a reporta mas e malesa e aña aki. Pa stop e contagio, Instituto Butantan di Sao Paulo, un di e institucion di investigacion medico mas prestigioso di e pais, a desaroya un vacuna na Brazil cu a mustra un eficacia di 79.6% den ensayonan clinico.
