(Infobae) – Presidente di Brazil, Jair Bolsonaro, ta mantene e pio indice di evaluacion di su mandato, segun un encuesta publica pa Datafolha y corant Folha di San Pablo. Ta trata di e mesun porcentahe di encuesta anterior, realisa na september cu 53% a considera cu gobierno ta malo of hopi malo y 22% a consider’e excelente of bon.
E encuesta cu a entrevista 3.666 persona mayor di 16 aña entre 13 y 16 di december na 191 municipio Brasileño, tin un margen di eror di mas o menos dos punto.
Gobierno di Bolsonaro ta miho califica pa empresario (50%) y evangeliconan (32%). Sinembargo, e cifra di no aprobacion mas halto ta entre e comunidad homosexual y bisexual (75%), studiantenan (73%), hobennan di 16 pa 24 aña (59%) y residentenan na zona nort di e pais (58%).
Di otro banda, diahuebs ultimo tambe a keda conoci e encuesta di Confederacion Nacional di Transporte (CNT) pa loke ta trata eleccionnan presidencial di otro aña. Ex-presidente Luiz Inacio Lula da Silva ta sigui lider cu intencion di voto cu 17.1 punto porcentual di bentaha riba su rival principal, Jair Bolsonaro ken tin un desaprobacion di 62%.
Lula, lider di e potencia sur Americano entre 2003 y 2010, lo por conta cu 42.8% di faboritismo, despues Bolsonaro, mandatario actual di Brazil, cu 25.6% di e votonan.
Lula, ken no a oficialisa su candidatura te ainda, tabata impedi di participa den eleccionnan di 2018 den cual Bolsonaro a resulta vencedor, despues cu Lula a ser condena pa corupcion pa e hues na e momento ey, Sergio Moro, ken a laga su magisterio pa eherce como minister di Husticia di Bolsonaro, relacion laboral cu a caba den mal termino.
Segun e sondeo, pa eleccionnan presidencial Moro ta ubica na di tres luga cu 8.9% di voto, Ciro Gomes ken tambe tabata candidato na 2018 na di cuater luga cu 4.9% di apoyo y Joao Doria, gobernador actual di Sao Paulo na e di cinco luga cu 1.8% di faboritismo.
