Despues di keda registra un caso di enfermedad di baca loco na e estado di Mato Grosso, tur cos ta mustra cu esaki ta otro sla pa e exportadonan di carni di e pais Suramericano.
Exportacion ta keda temporalmente suspendi cumpliendo asina cu e protocol sanitario y di cuarentena entre Brasil y China, segun Ministerio di Agricultura di Brasil, a anuncia. E cargamento di carni manda despues di 30 di mei lo mester debolbe na e productornan of manda pa otro pais.
E suspension ta un medida di protocol y pronto lo por revisa esaki conforme e autoridadnan Chines cu ta studia e detayenan di e caso. Asina e comunicado di prensa di Ministerio di Agricultura a bisa.
E ministerio a bisa diabierna pasa tambe cu a haya un baca di 17 aña cu encefalopatia espongiforme bovina, of EEB na Mato Grosso. E caso ta considera como algo cu no ta tipico, ya cu e animal a contrae e enfermedad neurologico di forma espontaneo na luga di a trabes di hariña di carni y weso contamina.
E productornan Brasilero di carni ta preocupa pa un serie di noticianan malo, entre nan e prohibicion di exportacion, desde cu a produci un scandal grandi di siguridad di alimentacion dos aña pasa. China ta e destino principal pa e carni di baca di e pais y ta representa 20% di e exportacion total aproximadamente.
