Ministerio di Husticia y Siguridad Publico a impone un multa di 6,6 miyon real (1,6 miyon dollar) riba Facebook pa filtracion di datonan di 443.000 usuario Brasileño cu a ser utilisa pa e consultor internacional Cambridge Analityca.
Segun Gobierno, ta existi evidencia cu tabatin un practica ‘di abuso’ cu e datonan di e usuarionan aki di parti di Facebook Inc y Facebook Serviços Online do Brasil Ltda.
“Ta evidente cu e datonan di e cerca di 443.000 usuario di e plataforma tabata na disposicion no debido di e desaroyado di e aplicacion thisisyourdigitallife cu obhetivo por lo menos cuestionabel”, Departamento di Proteccion di Consumidor (DPDC), cu ta depende di Ministerio, a bisa den un comunicado ayera dialuna.
Segun e Ministerio, e procedura administrativo a investiga e violacion di e datonan personal di e consumido contratante di e plataforma di Facebook, como tambe si algun hende tabatin acceso incorecto na e datonan ey, teniendo na cuenta e forma di consentimento di e usuario.
A cuminsa investiga e caso despues cu medionan di comunicacion a informa na april 2018 cu usuarionan Brasileño di Facebook por ta victima di uzo no debido di nan datonan, na man di e empresa consultor politico Cambridge Analityca.
E empresa di analisis di dato aki, cu a colabora cu e ekipo di presidente Mericano Donald Trump, durante e campaña pa eleccionnan di 2016, a reconoce cu a emplea e datonan suministra pa Facebook pa desaroya un programa di informatica destina pa pronostica e decisionnan di e votado y por influi riba dje.
E momento ey, DPDC tabata atento pa e testimonio cu Mark Zuckerberg a duna na Congreso di Merca, cu a hustifica e apertura di un proceso contra e empresa, como tambe e informacion cu Facebook a admiti cu e filtracion tambe a afecta usuarionan Brasileño.
Di acuerdo cu Facebook, cerca di 87 miyon di persona cu tabatin nan dato exponi, un cantidad di 443.000 ta usuario na Brasil y nan a ser notifica caba di loke a sosode.
