Polis federal di Brasil a implementa un operacion contra un organisacion cu a purba di laba placa, cu ta bin for di mercado preto y cu nan ta busca manera pa converti den placa legal na Brasil. E placa a sali di Venezuela, segun autoridad local a informa.
Segun e investigacion cu ta den desaroyo ainda, varios empresa cu tin sede na Venezuela, entre nan un empresa di estado di Venezuela, a manda hopi placa pa Brasil, pa cumpra makinaria y producto agricola, aunke un parti di e mashinnan aki nunca a yega te na man di fabricante y proveedornan.
E placa a pasa via varios cuenta di banco y finalmente a ser manda pa exterior, caminda tabatin como destinatario un persona huridico cu sede na paraiso fiscal, segun un comunicado di polis federal di Brasil a informa. Polis a cuminsa dialuna cu un operacion conoci como ‘Conexion Venezuela’.
Autoridad ta kere cu parti di e placa cu a ser manda pa Brasil, di banda di e empresa estatal di Venezuela no ta producto di algun delito o crimen. E nomber di e empresa Venezolano cu a participa den e operacion aki, no a keda revela ainda.
Entre 2010 y 2014, e organisacion aki a move mas di 200 miyon (64.7 miyones dollar).
Polis a cumpli cu e mandato di prizon na varios ciudad di estadonan manera Río Grande do Sul y Sao Paulo, caminda tin orden di aresto contra seis persona.
Investigacion a cuminsa despues cu administracion federal di impuesto, organismo cu ta recoge impuesto na Brasil, a identifica un persona huridico na Rio Grande do Sul y na Sao Paulo, cu a haci operacion financiero “atipico”.
