Brasil a desplega diadomingo pasa dos avion Hércules C-130 den un operativo militar fuerte pa paga e candelanan cu ta destrosa varios parti di Amazon, mientras protestanan nobo a ser anuncia contra Presidente Jair Bolsonaro, pa su gestion den e pio candelanan produci durante añanan den e mayor selva tropical di mundo.
Diabierna y diasabra pasa a declara 1.130 candela nobo, segun Instituto Nacional di Investigacion Espacial (INPE) di Brasil. Mayoria di nan tin luga den e cuenca di e riu Amazonas.
Huma fuerte tabata cubri e ciudad di Porto Velho na estado di Rondonia, unda Ministerio di Defensa a indica cu e avionnan a cuminsa basha miles di liter di awa riba e candela, cu a aumenta den ultimo oranan.
E candela a destrosa areanan di e region frontera cu Bolivia y a provoca un huma fuerte cu ta aumenta e contaminacion den e hanchura di Amazon, tesoro ecologico di 5.5 miyon di kilometer2 bou menasa.
E zona selvatico ta conta cu 43.000 milita, cu den forma permanente ta na disposicion di paga e candelanan. Centenares di bombero a dirigi diadomingo pasa pa Porto Velho pa yuda paga e candela.
Expertonan ta afirma cu e deforestacion durante e temporada di secura ta pa terenonan cultibabel y cu e problema a bira pio e aña aki.
Lidernan di e potencia mundial, cu a reuni na e cumbre G7, a acorda pa yuda e paisnan mas afecta pa e candela ‘lo mas rapido posibel’, presidente Frances, Emmanuel Macron a manifesta diadomingo pasa.
