(EFE) – Siguidonan di e presidente Brasilero, Jair Bolsonaro diadomingo ultimo a protesta na e principal ciudadnan di e pais, como Sao Paulo, Rio de Janeiro, Brasilia y Belo Horizonte, contra e medidanan di restriccion cu a wordo imponi pa Gobiernonan regional pa detene e pandemia.
E manifestacionnan a wordo convoca riba rednan social pa gruponan ‘Bolsonarista’ y esun di mas grandi a tuma luga na Sao Paulo, e mayor ciudad di e pais, cu a reuni cerca di mil persona hunto cu un caravana grandi di auto.
E participantenan, den su mayoria bisti cu colornan di e bandera di Brasil y sin tapa boca, a pronuncia contra e medidanan di distanciamento social cu diferente Gobierno regional y municipal a implementa pa asina purba di detene e propagacion di Covid-19 na e momento cu Brasil ta bibando e pio momento di e pandemia.
Gobiernonan di Sao Paulo, Rio di Janeiro y Brasilia, entre hopi otro mas, den ultimo dianan a impone medidanan como toque de queda den oranan di anochi, a prohibi evento cu aglomeracion di hende, ceramento di negoshinan, pa purba di detene e propagacion di e virus na momento cu nan sistema hospitalario ta yegando na collapse pa falta di unidad di cuido intensivo.
E medidanan a wordo critica pa Bolsonaro, lider di ultra derecha Brasilero y cu for di comienso di e pandemia a nenga e gravedad di e malesa aki, a defende e uso di medicina contra Covid-19 sin comprobacion medico y a pone den duda e eficacia y siguridad di e vacunanan.
E hefe di Estado ta sigura cu e medidanan di restriccion ta provoca e ceramento di empresanan y ta genera desempleo, cu esey tin e pio efecto cu esun cu pandemia mes tin, ya cu por provoca hamber y mortonan.
Algun di e manifestantenan, a probecha e concentracion pa defende un intervencion militar na Brasil pa asina ey lo amplia e poder di Bolsonaro y lo kita esun di magistrado di e Corte Supremo di Husticia.
