E aña aki a alcansa un record di 72.843 candela na Brasil, segun e centro di investigacion espacial di Brasil INPE, na momentonan cu tin candela activo na varios luga di e selva Amazonico y ta crece preocupacion pa e politica ambiental di e presidente derechista, Jair Bolsonaro.
E aumento a yega na 83% compara cu e mesun periodo na aña 2018, e agencia a bisa diamars pasa y den total ta e mayor desde cu a cuminsa cu e registro na 2013.
INPE a bisa cu desde diahuebs pasa, e imagen di satelite a detecta 9.507 candela forestal nobo, principalmente na oriya di riu Amazonas, hogar di e boske tropical mas grandi di mundo y cual ta considera vital pa contraresta e keintamento global.
E potretnan ta mustra e estado di Roraima cubri cu huma scur. Esun di Amazonas dia 9 di augustus a ser declara den estado di emergencia den sur y na capital, Manaos. Acre, frontera cu Peru, desde diabierna pasa tin alarma ambiental pa via di e candela.
E candela ambiental a aumenta na Mato Grosso y Para, dos estado agricola cu a pusha agricultura te na riu Amazonas y unda a stimula e deforestacion.
E candelanan ta comun den stacion seco, pero tambe ta provoca pa algun agricultor cu ta kima ilegalmente e tera pa dedica pa e cria di ganado.
Agencia espacial INPE a bisa cu no por atribui e cantidad grandi di candela forestal na stacion seco of fenomeno natural so.
