(EFE) – Alcalde di Rio de Janeiro Eduardo Paes, a propone e celebracion di un mini-carnaval anticipa na isla Brasilero di Paquetá, cu su poblacion lo wordo vacuna di forma masivo diadomingo di e siman aki.
“Si tur cos ta bay bon, nos tin caba nos prome evento test marca. Ban Vacuna!” Paes a afirma den un mensahe riba Twitter.
E mandatario, cu ta un amante declara di carnaval, ta pretende organisa e fiesta na september na isla cu ta ubica na bahia di Guanabara, un ora na boto di e centro di Rio, den cual lo ta e prome evento masivo di e estado.
Den mini-carnaval aki tin planifica cu lo participa e bisiñanan di e bario di e isla aki na unda ta biba casi 4.200 persona, aunke Alcaldia no a duna detaye di e manera con lo controla e entrada di bishitantenan.
E carnaval a wordo suspendi e aña aki na henter e pais debi na e avance fuerte di e pandemia na Brasil, un di e nacionnan mas asota na mundo y cu ya suma caba 17.4 miyon caso y mas di 487.000 morto.
Isla di Paquetá ta forma parti di un estudio di vacunacion masivo dirigi pa Alcaldia di Rio de Janeiro hunto cu e Fundacion Oswaldo Cruz (Fiocruz), un di e principal centro di investigacion di Latino America y responsabel pa e produccion local di e vacuna AstraZeneca.
Diadomingo di e siman aki tur e poblacion adulto cu no a haya e vacuna lo wordo vacuna di forma masivo, den marco di un estudio cu a wordo realisa di forma similar na otro ciudadnan como Serrana y Botucatu, ambos na estado di Sao Paulo.
E vacunacion ta continua cu pasonan slow na e pais y tan solo un cuarto di e poblacion ta vacuna cu e dos dosis, mientras cu poco mas di 11% e ricibi e dos vacuna.
