Ministro di Salud di Brasil, Luiz Henrique Mandetta, a confirma oficialmente e prome caso di coronavirus na Brasil, cu asina a bira e prome pais Latinoamericano cu un persona infecta pa e enfermedad nobo aki.
Di acuerdo cu e ministro, e momento aki ta obliga pa “pasa pa un fase nobo di medida, cu obhetivo di mitiga e efectonan na e pais y specificamente na Sao Paulo, unda a detecta e caso, interna na hospital Albert Einstein na e ciudad aki. El a declara cu gobierno federal a constitui un comite di emergencia cu ta reuni na Sao Paulo.
E persona infecta, un homber di 61 aña di edad, a caba di bolbe di un biahe na Italia, entre 9 y 21 di februari. El a drenta Brasil sin sintoma, pero despues di algun dia a presenta na un centro di salud cu problema di respiracion. Mientras tanto, el a participa na un reunion familiar, loke a haci cu ministerio di salud a pone 30 hende cu tabatin contacto cune bao observacion. Banda di e persona aki, tin ainda otro 20 caso bao investigacion, mientras den 59 caso sospechoso a conclui cu no ta trata di coronavirus.
Ministro Mandetta ta anticipa cu e cantidad di caso lo aumenta den e proximo dianan. Tambe el a bisa cu e gravedad di e virus ta “modera”. Segun Mandetta, di e personanan infecta gran parti ta den e rango di 40 pa 69 aña. Di e personanan aki 2,3% a fayece. E letalidad global ta indica cu e casonan mas grave ta pa esunnan di mas di 80 aña. Proporcionalmente, letalidad ta menos cu di e virus N1H1, segun declaracion di e mandatario Brasileño.
