Brasil: Petrobras ta confirma cu petroleo ta bin di tres campo Venezolano

E compania petrolero estatal Brasilero, Petrobras diabierna pasa a afirma cu e crudo plama na altamar desde september pasa y cu a extende pa 200 beach di e pais, a ser extrai for di tres campo di petroleo di Venezuela, aunke e causanan ta desconoci.

“Nos a haci analisis cu mas di 30 muestra y nos a conclui cu e crudo ta di tres campo Venezolano. E origen di e plamamento ta otro cos. Loke nos ta compronde ta cu tabata na costa Brasilero”, e Director di Asuntonan Corporativo di Petrobras, Eberaldo Neto a bisa den un conferencia di prensa na Rio de Janeiro.

E ehecutivo a indica cu e compania estatal ta compaña desde september e accionnan di recoge y benta afo e material, tambe nan a yega di recoge 30 muestra pa analisis di laboratorio na diferente punto di e costa extenso unda e mancha di crudo a cuminsa aparece den e beachnan.

Neto a detaya cu e petroleo a drenta den ‘un coriente marino cu ta bin for di Africa’ y cu na haltura di estado di Pernambuco ‘e ta separa’, situacion cu a hiba e material na costa nort y costa sur di henter e litoral.

Vice-Presidente di Brasil, General Hamilton Mourao, diabierna pasa a bisa cu probablemente ni Venezuela mes sa di e situacion di plamamento aki, pasobra e petroleo produci na e pais ey tin varios destino, como Cuba, Centro America, Africa of Asia y p’esey no a descarta e posibilidad di ‘tuma contacto’ cu Caracas.

Diaranson pasa, pa decision di Bolsonaro, e Minister di Medio Ambiente di Brasil, Ricardo Salles formalmente a pidi pa Organisacionnan di Estado Americano (OEA) pa Venezuela manifesta riba e plamamento aki, segun el a anuncia na radio y television, cu dia 9 di october pasa a insinua esey.