E empresa petrolero estatal Brasileño Petroleo Brasilero S. A. a informa ayera cu el a acepta pa paga US$ 2.950 miyon, pa resolve un demanda colectivo Mericano inicia pa inversionistanan cu ta intenta recupera placa cu nan ta bisa cu nan a perde como resultado di un scandal di corupcion.
Un grupo di inversionista a demanda e empresa despues cu husticia Brasileño a acusa ex ehecutivonan di e empresa di acepta mas di US$ 2.000 miyon na soborno durante un decada, principalmente di empresa di construccion y ingenieria.
No obstante, Petrobras no a admiti di a comete ningun delito den cuadro di e operacion, cu tabata un di e acuerdonan mayor di demanda colectivo di balor na Merca. Al contrario, e empresa a alega cu e tambe tabata un victima di e scandal yama Lava Jato, ya cu su balor di mercado a cay durante e investigacion.
Aunke e acuerdo no ta inclui reparacion di daño y perhuicio pa e inversionistanan cu a cumpra papel di balor di Petrobras den exterior, e compania a declara cu lo resolve tur e reclamonan di e inversionistanan na Merca, a consecuencia di e scandal. E hues Jed Rakoff di e Distrito di Manhattan (New York) mester aproba e acuerdo ainda.
E acuerdonan di fraude di balor mas grandi den historia di Merca ta inclui US$ 7.200 miyon despues di e collapse di Enron, US$ 6.200 miyon di WorldCom y US$ 3.200 miyon den caso di Tyco International.
