Ex-presidente di Brasil Luiz Inacio Lula da Silva tin planea biaha pa Italia pa un audiencia cu papa Francisco dia 13 di februari, despues cu husticia Brasileño a acepta un pedido pa aplasa un interogatorio otro siman, instituto Lula a confirma.
E interogatorio inicialmente tabata fiha pa dia 11 di februari, pero e sala 10 criminal di Brasilia a atende e pedido di e abogadonan defensor y a pospone pa 19 di e mesun luna, cu e fin cu e ex-hefe di Estado lo por biaha pa Italia entre e dianan 12 y 15 di februari segun su plan.
Den su opinion, e hues Ricardo Augusto Soares Leite a considera cu e cancelacion di e interrogatorio no lo afecta e proceso, ya cu “ta posibel pa atende e peticion realisa sin altera e programacion inicial” di e huicio.
Den e causa aki, Lula ta acusa di un presunto delito di corupcion pasivo, cu relacion na e proclamacion na 2009 di un retraso di incentivo fiscal pa e fabricante di autonan a cambio di supuesto soborno.
Lula, ken a pasa 580 dia den prizon y tin libertad provisional, ta condena den dos proceso pa corupcion y tin por lo menos otro shete investigacion habri den su contra.
E ex-mandatario a ser condena na instancia tres pa 8 aña y 10 luna pa corupcion pasivo y blankeo di capital, despues cu a hay’e culpabel di ricibi un apartamento na balneario paulista di Guaruja a cambio di fabornan politico di e compania constructor OAS.
Ainda e proceso mester ta analisa pa e Corte maximo di e pais, instancia ultimo posibel.
Otro condena cu ta pesa contra dje ta di 17 aña y un luna di prizon den un caso similar confirma den segundo instancia.
