(JornaldoBrasil) E cantidad di morto di keintura geel na estado Rio de Janeiro a yega na nuebe, segun informacion di Subsecretaria di Vigilancia di Salud, di e Secretaria di Estado di Salud. E caso mas reciente a keda registra na ciudad di Rio das Flores, na region Serrana di estado Rio de Janeiro. Na Valença, e enfermedad a mata cuatro persona, na Teresópolis dos, na Nova Friburgo un, y na Miguel Pereira, un.
Conforme un boletin divulga dialuna pasa pa e Subsecretaria di Vigilancia, e aña aki a registra na estado di Rio 27 caso di keintura geel cerca humano, incluyendo e nuebe casonan mortal.
Macaco
Na municipio di Niteroi, na region metropolitano di Rio, tabatin un caso confirma di keintura geel di un macaco. Secretaria di Estado di Salud ta reitera un biaha mas cu e macaconan no ta responsable pa transmision di e enfermedad, cu esaki ta ser transmiti a traves di pica di sangura.
E Secretaria ta recomenda hende cu topa cu macaco morto o malo (animal cu tin un comportamento abnormal, ta leu di su grupo o cu no ta move cu velocidad normal) pa informa e secretarianan di Salud di e municipio o di e estado lo antes posible. Ademas e Secretaria ta enfatisa e necesidad di vacunacion pa e personanan cu ainda no a vacuna, pa nan busca un puesto di salud cerca di nan cas pa nan haya esaki.
