Durante ultimo tres luna y cu e Covid-19 acelerando su paso den e nacion, Brasil a mira e renuncia di cuatro minister.

E economista, Carlos Alberto Decotelli, a wordo nombra diahuebs pasa pa e mandatario Jair Bolsonaro, pa hiba e cartera di Educacion. Tabata e prome persona afro-Brasilero den gobierno di e hefe di Estado y a wordo presenta como un experto den e area, cu experiencia amplio di gestion den area publico y priva. Su obhetivo tabata pa pone den funcion un ministerio den cual tres titular a pasa den un aña y mey di Gobierno di Bolsonaro.

Su curriculum tabata parce di demostra cu a yega un persona cu vinculo cu academia pa e cartera. E presidente a destaca su titulonan na universidadnan di Brasil y den exterior, entre nan tabata figura un doctorado di Universidad di Rosario na Argentina y un post-doctorado na Universidad di Wuppertal na Alemania.

Poco despues di su nombramento, algun di e institucionnan en cuestion a cuminsa nenga e logronan di Decotelli, cu te ainda no a huramenta pa e funcion.

“E profesor a haci un curso di educacion continuo, den programanan di desaroyo ehecutivo y no como profesor den ningun di e scolnan di Fundacion Getulio Vargas” e universidad a afirma.

Den relacion cu e doctorado di Universidad del Rosario na Argentina, e institucion a manifesta cu, aunke Decotelli si a haci su estudionan di doctorado eynan, e no a haya su titulo, debi cu no a aproba su tesis. E rector di e centro educativo, Franco Bartolacci, a skirbi riba su cuenta di Twitter cu e Brasilero no a termina su estudio.

Di su parti, e universidad Aleman a splica cu e economista a studia algun materia na Wuppertal, pero tambe a aclaria cu no tabata trata di estudio di post grado y cu e no a haya titulo den e institucion ey.

E exageracionnan cu Decotelli a haci riba su estudionan y su renuncia abrupto ta yega na un momento incomodo pa Bolsonaro, ora e ta purba di alivia e tension den otro cartera di Gobierno y minimalisa e cantidad di ciudadano cu no ta aproba su gestion, provoca pa e spiraal di contagio ocasiona pa e pandemia di Covid-19.