Hues federal Sergio Moro, responsabel pa e procesonan den e caso ‘Lava Jato’ den prome instancia, a condena ayera dialuna e ex gerentenan di Petrobras Edison Krummenauer y Marcio de Almeida Ferreira, pa corupcion pasivo y labamento di placa. Ambos lo a ricibi un suma di R$ 30 miyon (US$ 10 miyon).
Di acuerdo cu e sentencia e soborno a ser intermedia y paga pa e empresarionan Paulo Roberto Gomes y Marivaldo do Rozario Escalfoni, dirigente di e empresanan Akyzo Assessoria & Negócios Ltda. y Liderroll Industria e Comercio de Suportes, ademas di Luiz Mario da Costa Mattoni, ex director empresarial Andrade Gutierrez, cu tambe a keda condena den mesun proceso pa crimen di labamento di placa y corupcion activo.
Marcio de Almeida Ferreira, a keda condena na 10 aña y tres luna di prizon. E castigo di Edison Kummenauer a wordo stipula na 9 aña y cuatro luna, pero como cu el a acorda cu Ministerio Publico federal di coopera y duna informacion di otro acusadonan, su castigo a wordo reduci na apenas seis luna di prizon, sigui pa seis luna di aresto na cas y dos aña di prestacion di servicio comunitario. E resto di e castigo ta keda como libertad condicional.
E empresario Paulo Roberto Gomes a haya 14 aña y tres luna y Marivaldo do Rozario Escalfoni tambe a haya e mesun castigo. E empresanan controla pa nan (Akyzo y Liderroll) tabatin bienes confisca di R$ 29,6 miyon cu lo ser paga na Petrobras. Luiz Mario da Costa Mattoni a haya 8 aña di prizon, pero pa su colaboracion cu husticia ta haya cinco aña y mey di regimen semi abierto.
