E magistrado Edson Fachin, instructor di e investigacion di iregularidadnan en torno e caso di Odebrecht, a acepta e pedido di fiscalia, pa inclui e mandatario den e investigacion, acusando Temer di financiamento ilegal di su partido PMDB.
Den mesun decision, e hues a amplia te fin di mei e plaso pa polis federal cera e investigacion den un caso cu ta toca tambe e ministro di presidencia, Eliseu Padilha, y ministro di secretaria general, Wellington Moreira Franco, ambos di e entorno mas cerca di e presidente.
E asunto ta referi na supuesto comision paga pa Odebrecht a cambio di fabornan politico ricibi entre 2013 y 2015 di e Secretaria di Aviacion Civil, cu den e periodo ey tabata dirigi pa Padilha prome, y despues pa Moreira Franco.
Segun anterior ehecutivonan di Odebrecht a admiti, e pagonan ey tabata pa financia, por medio di operacionnan di “caha B” e campañanan di partido di Movimento Democratico Brasileño (PMDB), cu e tempo ey tabatin Temer como presidente.
Di acuerdo cu e testimonionan aki, Temer, cu na mes momento tabata vice-presidente di Brasil, a yega di participa na e negociacion di loke lo a paga na PMDB, algo cu e actual mandatario a nenga semper di forma enfatico.
Aña pasa e fiscal general Rodrigo Janot a nenga di inclui Temer den e investigacion, ya cu constitucion di Brasil ta impedi enhuicia un gobernante den pleno ehercicio di e cargo, pa echonan di prome cu el a asumi e cargo ey. Janot a keda substitui na september pa Raquel Dodge, cu tin otro interpretacion y a solicita pa amplia e averiguacion pa establece e papel di Temer den e asunto. Segun Dodge, aunke ta berdad cu no por enhuicia Temer pa e asunto, si por investiga e caso, un tesis cu hues Fachin a acepta. E fiscal general a argumenta cu Temer ya ta ser investiga den un asunto cu ta den man di Tribunal Supremo, pa supuesto maniobranan cu a beneficia ilegalmente un empresa di sector portuario.
