Riba decision di Hues na Curitiba, lo transferi Luiz Inacio Lula da Silva di prizon di Curitiba pa São Paulo. E ex-Presidente ta preso na prizon di Polis Federal na capital di estado Parana for di april 2018. E disposicion pa e mudansa a keda firma pa Hues Carolina Lebbos, di Husticia Federal na estado Paraná.
Lula a keda condena den e caso di ‘Triplex’ na Guarujá. A considera cu e renobacion di e apartamento di Lula, haci pa e empresa constructor OAS, tabata un forma di paga soborno na e politico.
Esaki ta e unico caso den cual el a keda condena te awor den segundo instancia, pues e unico caso pa cual e por ta cera. Sin embargo e politico di Partido di Trabao tin varios acusacion mas pendiente. For di aña pasa e ta sinta un castigo di 12 aña y 11 luna na Curitiba.
Na prome instancia el a keda condena na castigo di prizon debi na supuesto iregularidadnan cu ta involucra un tereno na Atibaia. E proceso ey ta cerca di keda conclui tambe den segundo instancia. Lula da Silva tabatin henter su carera sindical y politico y e mayor parti di su bida na region metropolitano di Sao Paulo, na ciudad di São Bernardo do Campo.
