Diahuebs polis di Brasil a cuminsa cu un operacion, pa detene mas di 200 agente y traficante cu ta supuestamente parti di un red criminal. E operacion ta den e accion di polis mas grandi den historia di Rio de Janeiro.
Den nan prome golpi polis di brasil a detene 49 agente di polis militar y 22 narcotraficante, acusa di participa den un set up di soborno. Polis ta spera cu den proximo oranan por detene 96 polis y 70 narcotraficante mas.
100 polis militar cu tabata of ta den distrito di São Gonçalo, na region metropolitano di Rio, tin un acusacion riba nan lomba di haya 1 miyon di real (300.000 dollar) pa luna, como parti di un soborno for di un banda criminal, webpage G1 a splica.
Investigacion ta mustra cu polis militar ta ofrece varios servicio na traficantenan, manera laga nan traha trankil den nan negoshi, ofrece proteccion y escolta pa nan transporte y posibilidad di haya arma pa e red criminal aki.
Entre Diahuebs y diadomingo varios auto di polis tabata core na São Gonçalo, pa asina colecta placa for di traficante, entre 1.500 y 2.500 real (500 y 800 dollar) pa polis cu tabata traha di guardia. Algun biaha e cantidad di placa por yega te 350.000 real (100.000 dollar) na total pa un siman.
E red a bira conoci pa delegacion di homicidio di distrito di Niteroi y São Gonçalo, despues cu nan a detene un suheto acusa di paga placa na polis y asina haya nan servicionan. Investigacion a cuminsa aña cu a pasa caba, despues cu un polis arepenti a wordo haya morto.
E Operativo a ser bautisa ‘operacion Calabar’, caminda ta participa 900 agente y delegado di polis civil.
