E enorme derame di residuo petrolero cu a contamina mas di 150 playa na costa noreste di Brasil por ta bin di un ‘barco fantasma’ cu tabata carga crudo Venezolano y tabata trata di evita e sancionnan Mericano, asina un experto na altura di e investigacionnan a declara, confirma asina informenan di prensa.
Brasil ta mantene nan pensamento cu e petroleo drama detecta na inicio di luna pasa y cu a contamina mas di 2000km di costa Atlantico, ‘muy probablemente’ ta di origen Venezolano, loke Pdvsa a nenga di confirma.
Marina Brasileño, cu ta coordina e investigacionnan, ta opina cu ta trata di un incidente ‘hopi compleho y sin precedente’ y ta maneha ‘varios hipotesis’ tocante e causanan di e derame.
“Por ta trata di un barco nabegando ilegalmente, pasando via ruta poco conoci, y cu tabata transportando crudo Venezolano a pesar di e sancionnan,” portavoz di Marina a conclui.
Ministro di Medio Ambiente di Brasil, Ricardo Salles, a bisa un comision di Congreso cu e petroleo drama ‘muy probablemente ta bin di Venezuela’, citando un informe di e empresa estatal Petrobras, cu ta yuda den e operacion di limpieza di mas di 150 playa afecta, den nuebe estado di noreste. Petrobras a sigura cu e residuonan encontra no ta produci ni bendi pa e empresa.
Te awor a recoge 200 tonelada di residuo di crudo a lo largo di mas di 2.000 km di costa, golpeando un region pober cu tin e playanan mas exuberante di Brasil y cu ta biba principalmente di turismo.
