E presidente di Banco Nacional di Desaroyo Economico y Social (BNDES), Paulo Rabello de Castro, a afirma ayera dialuna cu e e tendencia pa comete corupcion ta un ‘yaga Brasilero’. Den su participacion, como anfitrion tambe, na e evento ‘Ouvidoria 3.0’ (Ombudsman 3.0) el a destaca e importancia di denuncia haci cerca e Ombudsman pa yuda combati corupcion na Brasil.
Como ehemplo, sr. Rabello de Castro a menciona su propio BNDES, cu tin un ouvidoria (literalmente ‘luga di scucha’) cu ta ricibi un sin fin di denuncia contra actuacion di e banco. “E denuncianan tin un grado di urgencia extremadamente halto. BNDES ta orguyoso di procesa respuesta den maximo tres dia, mientras cu segun ley nos tin te 10 dia. Riba tereno di denuncia nos tabatin bastante exito den resolve hopi caso,” el a splica.
Paulo Rabello de Castro a resalta cu, por medio di su canal di ombudsman, BNDES a descubri cu tabatin un persona na Maranhao cu tabata presenta su mes como intermediario pa facilita negociacion pa financiamento cerca e banco.
El a clarifica cu e banco no ta traha cu ningun tipo di intermediario. “Nos obhetivo ta pa haci tur cos facil y accesibel, mas tanto cu nos por, pa e interesadonan tin posibilidad di dialoga cu e banco y haya e colaboracion financiero cu nan mester, independiente di cualkier tipo di intermediacion.”
Den e caso di e denuncia haci na Maranhao, sr. Rabello a bisa cu tabata posibel haci un bon trabao di clarifica e asunto pa e poblacion local y cu e caso finalmente a bay pa husticia como caso penal.
E evento Ouvidoria 3.0 promovi pa Ministerio di Transparencia y Contraloria General Federal, cu meta pa stimula trabao di Ombudsman na nivel nacional, a tuma luga dialuna y diamars pasa na sede di BNDES, na Rio de Janeiro.
