Hues di tribunal di segundo instancia di Brasil a concede ayera libertad pa e ex-presidente Michel Temer (2016-2018). E decision a ser tuma pa e hues Antonio Ivan Athié, di e Tribunal Regional Federal di e Region 2, corte di segundo instancia cu tabatin plania analisa diaranson pasa un recurso di habeas corpus cu a ser interponi pa e defensa di Temer.
E ex- mandatario di 78 aña, a permanece den un sala special na e Superintendencia Regional di e Polis Federal di Rio de Janeiro, despues di su aresto pa supuesto vinculo cu e Operacion Lava Jato, e scandal mayor di corupcion na historia di e pais.
Temer a ser deteni diahuebs 21 di maart pasa como e presunto lider di “un organisacion criminal” cu lo por desvia cientos di miyones di dollar den cuarenta aña.
E operacion ta investiga ‘crimen di corupcion, desviacion di fondonan y labamento di placa’ cu ‘pago ilicito’, cu a ser efectua pa un empresario ‘pa e organisacion criminal cu Michel Temer ta como lider’, Ministerio Publico Federal (MPF) a señala.
E nucleo di e red ey tabata constitui pa Temer ora e tabata secretario di Siguridad Publico na Sao Paulo, mediadonan di añanan 80, y e coronel retira Joao Baptista Lima Filho, ken a acompaña Temer na e largo di henter su carera y ta forma parti di e detenidonan di diahuebs pasa.
