E huma di loke ta conoci como un di e pio candela forestal na Amazonia di Brasil y tambe na Bolivia a yega na Peru. E desaster a provoca e rechaso di e gestion di presidente Jair Bolsonaro na varios pais.
Segun fuentenan di e Centro di Operacion di Emergencia Regional (COER) di Madre de Dios na Peru a informa. Te awor, e huma ta percibi solamente pa e poblacion cu un holo ‘ainda no tan fuerte’, pa loke awor e autoridadnan regional no a tuma ni un medida di emergencia y e calidad di aire ta vigila pa e Servicio Nacional de Metereologia e Hidrologia (Senamhi) y otro institucionnan concerni.
E Servicio nacional Forestal y di Fauna Silvestre (Serfor) a descarta cu e candela grandi cu ta expande te e region Boliviano di Santa Cruz lo representa un peliger pa e teritorio Peruano. E parti mayor di e huma di e candela aki a desplasa pa e costa Atlantico di Sur America y a provoca cu shelo a bira scur den oranan di atardi diaranson pasa na Sao Paulo, ubica centenares di kilometer for di e candela.
Aunke ainda no ta existi un reporte oficial di e superficie di selva cu a kima, ta calcula cu ta miles di hectar cu a ser consumi pa e candela na estado Brasileño di Rondonia, Mato Grosso y Mato Grosso del Sur, y na departamento Boliviano di Santa Cruz.
