Minister di Relacionnan Exterior di Brasil, Ernesto Araujo, ayera dialuna a califica como “falsa electoral” e resultado di eleccionnan di parlamentario celebra diadomingo ultimo na Venezuela y cu a duna como vencedor e chavismo.
Segun Araujo, e resultado di purba “un legitimacion” ta “mas di opresion cu hamber” pa Venezolanonan y mas “forsa pa e crimen” na tur e region.
“Sinembargo, pueblo Venezolano a rechasa e falsa electoral, cu un participacion hopi abou cu a mustra cu eleccionnan legislativo no ta representa su boluntad”, e canciyer a publica riba Twitter, despues di conoce e resultadonan oficial.
Chavismo a gana eleccionnan parlamentario na Venezuela cu a wordo realisa diadomingo ultimo, marca pa un abstencion masivo y e boicot cu oposicion a haci y cu ta apoya su lider Juan Guaido.
Cu un participacion di 31%, Conseho Nacional Electoral (CNE), un organo cu oposicion Venezolano ta acusa di presunto parcialidad cu Gobierno di Nicolas Maduro, den oranan di marduga di dialuna ultimo a anuncia cu nan a haya 3.5 miyon voto, loke ta supone 67.6% di apoyo rekeri.
Di acuerdo cu Araujo, regimen di Maduro a celebra “eleccionnan parlamentario” pa “trata di legitima su mes” y a bisa cu esey lo pasa unicamente “den wowonan di esunnan cu ta aprecia of tolera dictadura y crimen organisa”.
Gobierno di Jair Bolsonaro no ta reconoce e legitimidad di Maduro, pa ken e ta denuncia como dictador, y na cambio, e ta wak’e como un lider di Venezuela e opositor Juan Guaido, ken tin e respaldo di casi 50 pais como presidente interino.
