Fiscalnan General di Brasil a presenta un peticion hudicial dialuna pasa pa evita cu e yiu homber di presidente Jair Bolsonaro, Eduardo Bolsonaro bira embahador na Merca, debi na su falta di experiencia como diplomatico.
Fiscalia publico a pidi pa corte di Brasilia pronuncia riba e necesidad pa e funcionarionan cu no ta diplomatico profesional, conta cu experiencia internacional y a fungi un cargo pafo di e pais pa por lo menos tres aña.
Tambe e legisladonan di oposicion a intenta evita cu Eduardo Bolsonaro lo converti den e enviado di Brasil na Washington, nan a presenta un proyecto di ley contra nepotismo den administracion publico.
Bolsonaro, cu a desaroya laso cu e presidente Mericano, Donald Trump, desde cu el a asumi poder na januari, a defende e nombramento di su yiu y a bisa cu e ta amigo di e famia di e mandatario republicano, y cu esey lo yuda mehora e relacion entre e dos pais.
Pero algun pais aliado di Bolsonaro na e Congreso, unda e Senado ainda tin cu ratifica e nombramento, ta considera cu e decision di e mandatario di derecha extrema ta habri un escenario sin precedente pa e diplomaticonan experimenta di Brasil.
Legisladonan di oposicion di ambos camara di Congreso ta apoya e proyecto di ley contra nepotismo y e partido Ciudadania a pidi e Supremo Tribunal Federal pa prohibi e nombramento door cu nan ta considera esey como ‘nepotismo descarado’.
