(JornaldoBrasil) – Tin señal cu Brasil a cuminsa tuma e menasa di keintura geel na serio di berdad. Ministro di Salubridad di Brasil, Ricardo Barros, a inaugura diahuebs pasa e linea final di produccion di vacuna contra keintura geel na instalacionnan di Libbs Farmaceutica, na Sao Paulo.
E medida ta parti di un acuerdo di transferencia tecnologico entre e empresa priva y e Instituto di Tecnologia di Imunobiologico (Bio-manguinhos) di e fundacion Fiocruz, pa aumenta e capacidad di produccion di e material te 48 miyon di dosis pa aña. E etapa final ta consisti di preparacion y empake di e producto.
“Cu e inauguracion di e linea di produccion aki, nos ta logra duplica e produccion nacional di vacuna contra keintura geel. Actualmente nos tin den stock suficiente vacuna pa inmunisa henter poblacion Brasileño cu ainda no a haya vacuna”, e ministro di Salubridad a declara.
Desde mita di 2016, Bio-Manguinhos ta trahando pa realisa e acuerdo aki, transferiendo tur e conocemento necesario pa e parti final di e produccion. Segun programa, na februari e prome testnan di calidad di e producto lo mester bay pa aprobacion pa Anvisa, (Agencia Nacional di Vigilancia Sanitario). Ta spera cu pa cuminsamento di juni e prome entrega na ministerio di Salubridad por tuma luga.
E aumento di produccion di vacuna ta señal cu gobierno Brasileño a cuminsa tuma e epedemia di keintura geel na serio. Diahuebs pasa a cuminsa tambe e campaña di vacunacion na e municipionan di estado Sao Paulo y Rio de Janeiro. Na tur mester vacuna 23,8 miyon persona na 77 municipio. Na estado Sao Paulo, ta spera di vacuna cerca di 10,3 miyon persona, y na Rio de Janeiro un total di 10 miyon. Na estado Bahia lo ta trata di 3,3 miyon di habitante.
Pa yuda e estado y municipionan cu e vacunacion, ministerio di Salubridad a destina 54 miyon Real (US$ 18 miyon) pa structura e campañanan.
