Un enfrentamento entre presonan di un prizon na estado di Amazona, na nort di Brasil, a causa e fayecimento di 15 persona, autoridad di e prizon regional a informa diadomingo pasa.
E pelea a produci na dos seccion durante e orario di bishita, na e Compleho Penitenciario Anisio Jobim (Compaj), 28 kilometer cerca di Manaos, capital di Amazonas, segun e Secretaria di Estado di Administracion Penitenciario di e region a detaya. Na januari, e prizon aki tabata escenario di un rebelion cu a extende pa casi 20 ora y a laga 56 morto, un di e masacrenan mayor na e sistema di prizon di Brasil.
“Tabata un pelea entre e presonan. Nunca a registra un morto durante e bishita. Esaki ta e prome biaha cu a sosode, ta algo poco comun. Algun di nan a muri paden di e cel cu e heki cera”, coronel Marcos Vinicius Almeida, titular di e despacho regional, a bisa den un conferencia di prensa.
Almeida a aclara cu a habri un investigacion pa determina e causa di e pelea, y a anticipa cu e estado no ta reconoce e concepto di faccion (banda), e caso ta wordo trata como un enfrentamento entre e mesun presonan.
Sinembargo, e secretario di Siguridad Publico di Amazona, Louismar Bonates, a aclara pa e diario Folha de S. Paulo, cu ‘tabatin un enfrentamento entre dos grupo organisa paden di e luga, cu tin conflicto, y nan a probecha e momento di e bishita di famianan pa realisa e accion aki’.
Brasil ta e di tres pais cu mas poblacion di prizonero rond di mundo, cu 726.712 preso (na 2016), cu ta biba generalmente montona y bou mando di banda cu ta disputa e control di trafico di droga, y cu ta resolve pa via di ahuste di cuenta violento frecuente.
