Brasil ta custumbra desde hopi tempo pasa na matansa vincula cu delincuencia, pero di ni un manera na masacre na scolnan manera loke a sucede ayera, diaranson, na un scol publico di Suzano, den e zona metropolitano di Sao Paulo.
Dos ex- alumno, un adolescente di 17 aña y un hoben di 25 aña, a drenta cu arma na un scol den oranan di mainta, y a mata ocho persona, entre nan cinco alumno. Segun polis, ambos a mata su mes den e centro educativo.
E atacadonan, ambos cu cara tapa, a sembra teror den e aula di e scol estatal Professor Raúl Brasil cu un arma di candela revolver 38, un ballesta, un arco, flecha y artefacto cu ta parce explosivo, segun e coronel Marcelo Salle a informa. Entre e personanan fayecido tambe tabata e coordinador pedagogico y otro empleado. Antes di comete e crimen contra e studiantenan y e profesor di su antiguo scol, e pareha a horta y mata un comerciante. Te e momentonan aki, ta desconoce e motibo di e suceso.
Despues di sembra e teror entre e studiantenan di e scol, e dos agresor a dirigi pa e centro di idioma di e scol. Pero nan no a continua cu e masacre, pa motibo cu e studiantenan y profesor a cera e portanan y nan no a laga drenta, pa nan lo sigui cu su plan. Ambos a mata su mes na e gang, segun vocero di polis y e gobernador di Sao Paulo, João Doria, a sigura.
