Devastacion na Amazonia Brasilero a bira pio cu Jair Bolsonaro na poder. Entre augustus di 2019 y juli 2020, e deforestacion na selva Amazonico a aumenta un 9.5% compara cu e mesun periodo aña anterior y a alcansa un mayor nivel desde 2008.

E perdida di cobertura vegetal den e area aki, cu ta abarca mas o menos un 60% di e teritorio Brasilero, a yega te 11.088 kilometer cuadra den ultimo aña, un area superior compara cu paisnan henter como Libanon of Jamaica.

E datonan a wordo publica dialuna ultimo pa Instituto Nacional di Pesquisas Espacial (INPE) di Brasil, cu tin vinculo cu Gobierno, cu imagennan di satelite ta confirma e aumento di e deforestacion na ecosistema Amazonico.

E cifra cu ta preliminar y lo wordo confirma e proximo aña, ta superior na esun registra entre augustus di 2018 y juli di 2019, momento cu yega na 10.129 kilometer cuadra, y esun di mas pio desde 2008 (12.911 kilometer).

E balans ta prome bao responsabilidad completo di Bolsonaro, cu a asumi e poder na januari 2019 y cu ta hayando basta presion pa via di su politica ambiental, obheto di criticanan di parti di ecologistanan, importante fondonan di inversion, companianan grandi y algun gobiernonan Europeo.

E lider ultraderechista, cu ta defende e explotacion di recursonan natural na Amazonia, incluyendo e reservanan indigena, aña pasa a pone den duda e estadisticonan oficial riba deforestacion.

Vice-presidente Brasilero, Hamilton Mourao, den su condicion di hefe di Conseho Nacional di Amazonia, a reconoce pa periodistanan cu no tin motibo pa “celebra nada”, pero a señala cu e datonan ta mustra cu e “esfuerso” di Ehecutivo “ta dunando su fruto”.

ONG’s medio ambiental a interpreta e resultado di manera diferente y a afirma cu ta refleha “un proyecto exitoso di aniquilacion di capacidad di Estado y di organonan di fiscalisacion” pa lucha contra e crimen na Amazonia.

Estado di Para, na curason di Amazonia, a contesta pa 46.8% di tur e superficie destrui. Despues a sigui Mato Grosso (15.9%) y Amazonas (13.7).

Mourao a informa cu 45% di deforestacion a sucede na propiedadnan y otro 30% na areanan publico, “den teranan cu no a wordo entrega pa ni un hende” cu no ta unidad di conservacion, ni teranan indigena, ni ta den man di hende particular”.