Procurador di Brasil, Rodrigo Janot a duna na Supremo Tribunal Federal, un lista cu tin 80 solicitud di investigacion pa politico, cu ta relaciona cu caso di corupcion di Odebrecht.
E lista di Janot ta inclui ministro di gobierno di presidente Michael Temer, senador y diputadonan. E lista ta basa riba 950 testimonio di 78 ex ehecutivo di Odebrecht, corant Folha de Sao Paulo a publica. E informe aki lo pone na disposicion di e relator di caso lava jato, caminda hopi funcionario ta ser investiga, y cu ta inclui gobernador y politico en general.
Ademas di e lista di Janot, tin un gran cantidad di funcionario cu awor ta bao investigacion di instancianan inferior, den cual ta aparece gobernador, ex- gobernador, politico y personanan en general. Ta trata di e di dos lista cu a ser presenta pa Janot, despues cu na aña 2015 a revela e nomber di 47 persona cu tabata supuestamente envolvi den scandal di corupcion Lava Jato, a base di testimonio di Paulo Roberto Costa, ex-director di Petrobras, y di Alberto Youssef un bankero di mercado ilegal, envolvi den varios scandal financiero.
