E puntonan turistico principal di Rio de Janeiro, entre nan e iconico Cristo Redentor, a habri nan portanan back pa publico diasabra ultimo, despues di pasa cinco luna cera pa via di e pandemia di coronavirus nobo.
“E reapertura di e Cristo ta simbolisa e reapertura di Brasil pa turismo”, asina ministro di Medio Ambiente, Ricardo Salles, a bisa durante inauguracion di e monumento.
E bishitantenan lo tin cu usa mouthmask, mantene distancia y no sinta riba vloer, un cos habitual entre esnan cu ta busca un angulo mihor pa saca un potret na pia di e estatua gigante di brasanan habri.
Ubica na Sero Corcovado (710 meter di haltura) na Parke Nacional Tijuca, e santuario ta ofrece un bista panoramico di e ciudad. A suspende e bishitanan na maart, ora a impone medidanan di distanciamento social pa detene contagio di e virus.
Durante e tempo aki, el a continua funciona como santuario religioso, cu misa sin publico y homenahe di Arquidiocesis pa victimanan di e pandemia y profesionalnan di salud.
Tambe a habri pa publico diasabra ultimo e teleferico di sero Pao de Açucar, cu ta ofrece un bista panoramico desde otro punto di e ciudad, e Acuario AquaRio y e wiel gigante Rio Star, un atraccion na e zona portuario inaugura aña pasa.
Confederacion Nacional di Comercio y Bienes, Servicio y Turismo (CNC) ta calcula cu den ultimo cinco luna turismo Brasilero a keda sin factura casi 154.000 miyon real (casi 30.000 miyon dollar) operando na 14% di su capacidad.
Na henter Brasil, e virus a causa 106.500 morto, y 3.2 miyon di contagio. Sin un perspectiva cla di ki momento un vacuna contra e virus lo ta disponibel, Alcaldia a anuncia cu ta diseña otro formato pa e fiesta di fin di aña tradicional, cu normalmente ta atrae miyones di persona na playa di Copacabana pa asina wak e show di vuurwerk.
