Diahuebs pasa Corte Supremo di Brasil a ordena Petrobras pa abastece e dos barco cu ta para na un waf den sur di Brasil ya pa dos luna. Inicialmente e petrolero estatal a nenga di suministra combustibel, argumentando cu si nan haci esaki, Merca lo pone nan riba e mesun lista sanciona cu e compania Irani ta riba dje caba.
E presidente di Tribunal Supremo Federal (STF) di Brasil, magistrado José Antonio Dias Toffoli, a duna di conoce ademas cu a rechasa un recurso di Petrobras contra e decision di Tribunal di Segundo Instancia cu ya caba a ordo pa nan abastece e barconan, segun fuentenan hudicial a informa.
Petrobras, e empresa mayor di Brasil, ta sigura cu el a nenga di suministra e dos barco, cual ta hiba un carga di maishi Brasilero, pa por evita di drenta den e lista preto di companianan sanciona pa Merca, den cual supuestamente ya e empresa cu a contrata e barco ta aden.
“Petrobras no a abastece e empresa exportado pasobra e barco Irani contrata pa e compania Irani ta sanciona pa Merca”, e petrolero a agrega den un comunicado un siman pasa.
Si Petrobras ta suministra combustibel e compania ta core riesgo di ta inclui riba e mesun lista, loke lo causa dañonan ‘grave’ pa e petrolero di Brasil.
E magistrado a agrega cu Petrobras no ta core ningun riesgo di ta sanciona debi cu ora ta abastece e barconan, nan ta simplemente cumpliendo cu un decision hudicial.
