Corte Supremo di Brasil a alcansa diahuebs e mayoria di voto cu tabatin mester pa califica homofobia como un delito penal ekivalente na racismo, pero a dicidi di aplasa e decision final pa dia 5 di juni proximo.
Durante e di seis sesion dedica na e topico aki, cu ta debati desde aña pasa, dos di diesun magistrado di e Supremo a suma na e cuater cu a pronuncia na fabor di compara e delitonan di caracter sexual cu racismo, cu e Codigo Penal ta castiga cu rigor.
No obstante, aunke seis magistrado a pronuncia den sentido aki, e mayoria alcansa te ainda lo por altera, pues segun e normanan di e tribunal, cualkier di su diesun miembro por altera su voto prome cu a e proclamacion di e resultado.
E huicio ta coresponde na un accion presenta pa e Partido Popular Socialista (PPS), cu a denuncia un ‘omision di Parlamento’ den un asunto cual el a vincula cu e defensa di derechonan humano, consagra den Constitucion Nacional.
Segun hues Luiz Fux, kende su voto a consolida e mayoria di seis necesario, a argumenta: “Ora un miembro di e comunidad LGBT ta muri pa causa di un tiro perdi of den un asalto, nos ta dilanti di un situacion contempla den e ley penal.”
Sinembargo, a sigura: “Si e mesun persona ta agredi of asesina pa su condicion sexual, nos ta dilanti di un delito di homofobia.”
Varios magistrado a haci echo di studionan di organismo di derecho humano, segun e cual Brasil ta un di e paisnan den cual mas persona ta asesina pa nan orientacion sexual.
