E condena pa corupcion di ex-presidente di Brasil, Luiz Inacio Lula da Silva a ser ratifica pa un tribunal na Porto Alegre, loke ta compromete e aspiracionnan di e politico izquierdista pa logra un mandato nobo den e eleccion presidencial na october proximo.
E hues relator di e proceso di apelacion di e Tribunal Regional Federal di Porto Alegre, João Pedro Gebran Neto, a rechasa tur argumento di e defensa di e ex-presidente, y a vota na fabor di confirma e sentencia y a pidi pa aumenta e condena di nuebe aña y mey pa 12 aña y un luna di prison.
Paulsen, cu ta presidente di e octavo sala di e Tribunal Regional Federal di Cuarto Region, a coincidi cu e magistrado instructor di e proceso, Joao Pedro Gebran, cu e culpabilidad di Lula a keda demostra, y actualmente solamente falta pa e tercer hues duna su voto.
Apesar cu e condena ya ta conta cu un mayoria entre e tres miembronan di e sala, e resultado ta considera definitivo ora e ta proclama na final di e audiencia, debi cu e ultimo di e tres magistradonan por pidi mas tempo pa examina e proceso y cualkier di e tresnan por cambia nan voto ainda.
Por lo pronto Lula no lo drenta prison y ainda ta existi posibilidad chikito pa evita e prohibicion di participa den politica, por lo menos di inmediato.
