Principal scolnan di samba di Rio de janeiro, protagonistanan di un di e carnaval mas famoso na mundo, dialuna ultimo a anuncia cu lo realisa nan tradicional desfile dia 10 y 11 di juli di 2021 cu e condicion cu pa e fecha ey lo existi un vacuna contra Covid-19.
Na september pasa scolnan a laga den suspenso e Carnaval di Rio de Janeiro, e evento mas importante di Brasil y esun di mas famoso na mundo, ora a wordo cancela e desfilenan cu tabata planea pa februari di 2021 pa via di pandemia di coronavirus y plantia e posibilidad di aplasa nan of cancela nan definitivo.
Pero den un reunion realisa dialuna ultimo, protagonistanan di Carnaval a manifesta su apoyo pa e proposicion di realisa e desfilenan e prome 15 dia di luna juli, si lo existi un vacuna contra Covid-19.
Den e reunion, Liga di Scolnan di Samba di e Grupo Special (Liesa) a admiti cu, aunke e decision di aplasa e desfilenan no ta definitivo te ainda, nan a comunica pa nan gremio artistico cu nan lo por cuminsa prepara nan desfilenan.
“Idea ta pa nos por tin un desfile competitivo na juli, e posibilidad cu nos ta plantia ta cu nos por realisa e desfilenan dia 10 y 11 di juli, p’esey nos a comunica pa scolnan cu nan por cuminsa busca sponsornan y cuminsa prepara pa nan tur lo ta cla”, e presidente di Liesa, Jorge Castanheira a afirma.
E dirigente a agrega cu siguridad sanitario ainda ta e prioridad di scolnan di samba y cu p’esey e protagonistanan di Carnaval ta papiando cu specialistanan di Universidad Federal di Rio de Janeiro y Fundacion Oswaldo Cruz (Fiocruz), e mayor centro di investigacion medico na Latino America.
