Brasil a registra un number record di divorcionan durante segundo mita di aña 2020, den mey di e crisis di coronavirus cu a golpia henter mundo y aislamento masivo di miyones di persona, segun datonan publica diahuebs ultimo pa Scol Notarial di Brasil.
Entre juli y december di aña pasa, notario di tur e pais a ricibi 43.859 pedido di disolucion matrimonial, loke ta representa un aumento di 15% compara cu 38.174 solicitud di e mesun periodo di aña 2019.
Ta trata di e cifra mas halto den unico semester desde cu scol a cuminsa haci un siguimento di registronan, na 2007.
E numbernan ta pone den evidencia e crisis di enfermedad di Covid-19, cu ta registra mas di 214.000 morto y 8.7 miyon di persona infecta na e gigante di sur America, cu tambe a marca e relacion conyugal di Brasileronan.
Segun e institucion, e cifranan ta un refleho di mayor convivencia entre pareha, cu a keda obliga di keda na cas y comparti 24 ora pa dia, debi na medidanan di aislamento social imponi pa gobiernonan durante lunanan pa asina purba di stop e avance di e virus.
E entidad a señala cu e implementacion di un plataforma virtual pa cu parehanan por informa riba nan divorcio online a colabora cu e aumento aki, pa via cu a facilita e proceso oficial di separacion.
Di acuerdo cu un sondeo, october ta e luna cu mayor number di divorcio, ora a registra mas di 7.600 na tur Brasil.
Den comparacion anual, sinembargo, e number total di disolucion matrimonial na 2020 ta menor cu esun cu a wordo registra na 2019.
