Presidente Jair Bolsonaro diaranson pasa a firma un decreto cu ta prohibi e kimamento na henter e pais durante dos luna, pa purba di pone un stop den e multiplicacion di candela na Amazon, fuentenan gubernamental cita pa varios medio di Brasil a informa.
E decreto, publica ayera den e diario oficial, ta suspende e uzo di candela durante e 60 dia proximo na tur teritorio nacional, aunke ta mantene algun excepcion, di acuerdo cu loke e reporte a bisa.
E candela controla ta permiti pa Codigo Florestal Brasilero den circunstancia determina (como practica agricola y forestal den cual su uzo ta hustifica), desde cu nan ta autorisa pa mecanismo di control.
Di otro banda, Presidente Brasilero a ricibi diaranson pasa su homologo Chileno, Sebastián Piñera, cu ken a bisa cu a coordina un reunion di lidernan di paisnan di Amazon pa analisa e situacion di e candelanan.
E reunion, Bolsonaro a bisa den un rueda de prensa cortico hunto cu Piñera, lo mantene te cu dia 6 di september na Leticia, un ciudad Colombiano ubica na e frontera cu Brasil y Peru y lo conta cu e participacion di e presidentenan di tur e pais Amazonico, ‘excepto esun di Venezuela’, Nicolas Maduro.
Bolsonaro ta enfrenta un presion interno y externo cu ta crece pa e candelanan cu a multiplica den Amazon den siman ultimo. Desde januari ta diamars, a registra 83.329 punto di candela na Brasil, mas di e mita (52,1%) na e selva Amazonico, segun dato di Instituto di Observacion Espacial INPE.
