Presidente di Brasil, Jair Bolsonaro, a pidi su ministernan pa adopta ‘medidanan necesario’ pa combati e candela den e region di Amazonia.
“Mi ta determina pa tur minister di Estado pa adopta, den area di nan competencia, medidanan necesario pa combati e fucu di candela den e region di Amazonia pa e preservacion y defensa di e selva Amazonico, patrimonio nacional’, e mandatario a expresa a traves di un escrito cu a ser publica pa e Despacho Presidencial.
Tambe e Hefe di Estado a ordena e Minister di Medio Ambiente, Ricardo Salles, pa recopila datonan di e candela. Di acuerdo cu Veja, gobierno ta busca alimenta e version cu ‘tin poco candela’ y ‘hopi sensacionalismo’ den e caso.
Di su banda, e Minister di Presidencia di Brasil, Onyx Lorenzoni, diahuebs pasa a bisa cu e paisnan Europeo cu a manifesta preocupacion pa e aumento di e candela forestal na Amazonia ta probecha e discurso ambientalista pa hustifica restriccion comercial nobo contra e pais. El a sigura cu e paisnan cu a manifesta preocupacion pa e candela, ta haci esey den base di datonan no oficial y exagera.
Lorenzoni a agrega cu e Gobierno Brasileño ta haci esfuerso pa cuida e medio ambiente y cu tur organismo encarga di fiscalisa e deforestacion ta cumpli cu nan papel. “No tin ningun pais na mundo cu e superficie vegetal y forestal cu Brasil tin”, el a bisa.
E minister a defende e politica ambiental Brasileño despues cu Presidente Frances, Emmanuel Macron, a cualifica como ‘crisis internacional’ e candela cu ta destrosa areanan multiple di Amazonia y adelanta cu e topico lo bay ta presente den e cumbre cu lo tuma luga na Biarritz di G7, e grupo cu ta reuni e mayor potencia na nivel mundial.
