Oranan despues cu e grupo Anonymous a publica datonan personal di Jair Bolsonaro y su yiunan, ayera diamars e presidente di Brasil a anuncia cu lo tuma accion legal contra e movemento hacker.
“Ta claro cu ta un medida di intimidacion, e movemento hacktivista ‘Anonymous Brasil’ a publica na Twitter datonan di e presidente di e Republica y su famia. Nan ta adopta medidanan legal pa e delito aki lo no keda impune”, e hefe di Estado a señala riba Twitter.
Anonymous Brasil dialuna den oranan di anochi a publica datonan personal di e presidente di e pais, Jair Bolsonaro y su yiunan, e consejal Carlos Bolsonaro y e diputado federal Eduardo Bolsonaro. Ademas, a revela informacion di e ministernan Abraham Weintraub (Educacion) y Damares Alves (Hende Muhe, Famia y Derechonan Humano) y di e diputado Douglas Garcia.
E grupo di hacker a duna di conoce e numbernan di telefon, adresnan (fisico y e-mail) y datonan inmobiliario di e famia di e presidente.
Parti di e datonan, como declaracionnan di bienes, ya tabata publico caba y tabata disponibel den e plataforma di divulgacion di Husticia Electoral. Sinembargo, e numbernan di telefon y direccion e-mail, por ehemplo, tabata informacion reserva.
E informacion a wordo publica despues na Twitter a traves di enlace pa website cu documentonan, minuutnan despues e red social e elimina e publicacion, pero Anonymous Brasil a priminti cu lo no detene y haci cu e datonan aki lo ta disponibel atrobe.
Ministerio di Husticia di Brasil a ordena pa Polis Federal investiga e origen di e mensahenan.
