(NTN24) – Rio de Janeiro lo exigi for di september un certificado di vacunacion anticovid pa drenta na algun luganan publico, incluyendo puntonan turistico, alcaldia a informa ayera diabierna, preocupa pa e avance di e variante delta na e ciudad di Brasil aki.
Autoridadnan carioca lo pidi un comprobante di inmunisacion pa por drenta na sitionan turistico, gym, stadion, cinema, teatro, museonan y conferencianan, entre otro luganan publico.
“Nos lo crea dificultadnan pa esunnan cu no kier vacuna” e alcalde Eduardo Paes a anuncia den un conferencia di prensa e medida aki, cu no ta inclui barnan, restaurantnan y centro comercial.
Lo exigi na e personanan e prome of di dos dosis, di acuerdo cu e kalender di edadnan pa ciudad. Alcaldia a sigura cu tambe lo acepta certificado di vacunacion internacional pa esunnan cu a haya nan vacuna na exterior.
Rio ta e principal destino turistico di e pais cu luganan como estatua di e Cristo Redentor of e sero Pan de Azucar, na unda ta registra un aumento di contagio nobo pa coronavirus, cu autoridadnan ta atribui pa avance di e variante delta.
“Nos tin un modelo similar di otro paisnan cu ta vacuna su poblacion: variante delta ta provoca un aumento den number di casonan, pero no ta provoca un aumento den e mesun proporcion, di mortonan of internacional”, e Secretario Municipal di Salud, Daniel Soranz a considera.
E ciudad di casi 7 miyon habitante, ta acumula mas di 30.000 morto y 440.000 caso for di comienso di pandemia, y ta continua cu alerta di “riesgo halto” di contagio. Sinembargo, a vacuna caba 87% di e hende mayor di 12 aña cu un dosis y 42% cu e di dos.
Segun e alcalde, e “licencia sanitario” anuncia ayera diabierna ta busca stimula vacunacion, vooral pa e 200.000 persona cu no a bay busca su di dos dosis.
For di comienso di pandemia Brasil cu 213 miyon habitante, ta acumula mas di 577.000 morto.
