Amnesty International ta cuestiona e imparcialidad di polis civil den investigacion di e asesinato di e miembro di conseho municipal di Rio de Janeiro, Marielle Franco, y di su chauffeur Anderson Gomes.
Den un nota oficial divulga ayera, Amnesty ta cita un reportahe di TV Globo segun cual e polisnan di Rio lo tabatin 71 submetrayador HK MP-S, modelo cu lo a ser uza den e crimen.
Di e 60 armanan perteneciente na Polis Civil, cinco di nan lo a ser horta na 2011. Otro 11 submetrayador lo tabata pertenece na e Batayon di Operacion Special (Bope).
“Nos ta na casi 65 dia despues di morto di e defensor di derecho humano y politico municipal Marielle Franco. Durante e periodo aki, diferente informacion tocante e caso a keda aporta pa medionan di comunicacion, inclusive cu e municion uza tabata pertenece na un lote bendi na Polis Federal na Brasilia, y a ser horta na sede di Post, sin cu tabatin algun splicacion o declaracion oficial pa autoridadnan”, Amnesty ta bisa den e nota.
Segun e organismo, “e informacion cu arma di e mesun modelo cu lo a ser uza den e ehecucion di Marielle Franco,lo a ser desvia di e arsenal di polis civil, por compromete e competencia y independencia di Polis Civil den investigacion di e caso.” “Amnesty International ta urgi polis civil y secretaria di siguridad di estado Rio de Janeiro pa pronuncia nan mes encuanto e imparcialidad di e investigacionnan.”
Den un nota, secretaria di estado di seguridad (Seseg) a bisa cu “ta reitera su confiansa den polis civil di estado Rio de Janeiro (PCERJ) y den trabao di excelencia di division di homicidio.”
Seseg a bisa di ta “alinea cu e clamor di sociedad pa husticia y ta respeta e trabao tecnico di investigacion di cual e produccion di prueba cualifica lo hiba na condena di e culpbelnan.”
