(Infobae) – Alcalde di Sau Paulo, Bruno Covas, a muri ayera diadomingo cu 41 aña, di un cancer na su stoma cu e tabatin desde 2019, hospital Sirio-Libanes di e ciudad Brasileño na unda el a wordo atendi a informa den un comunicado.

E noticia a causa conmocion riba rednan social na unda di biaha miles di persona a expresa nan condolencia y solidaridad cu e famia, specialmente pa su yiu homber Tomas, di 15 aña.

“Danki Bruno Covas, pa comparti cu nos tur hopi cariño y dedicacion”, e gobernador di Sao Paulo, Joao Doria a bisa den un nota oficial.

Diabierna ultimo, ekipo medico cu tabata tratel’e na hospital a anuncia cu su cuadro tabata ireversibel y cu tabata ricibiendo medicamento analgesico y sedante.

Covas tabata permanece interna desde dia 2 di mei, despues cu a haya un sangramento na su stoma durante examennan previo pa sigui cu e tratamento di kimoterapia.

Pa via cu su salud a bira pio, e alcalde miembro di Partido Social Democracia Brasileño (PSDB) a pidi pa Camara Municipal di Concejal un licencia di 30 dia pa “dedica integralmente” na su mesun recuperacion.

“Mi curpa ta exigi cu mi mester dedica mas tempo na e tratamento, cu ta drenta den un fase hopi riguroso”, el a bisa den un comunicado cu a wordo publica riba Twitter.

E vice-alcalde Ricardo Nunes a asumi su funcion y mester finalisa e mandato, cu ta culmina na 2024.

Covas, tabata divorcia. El a studia ley y tabatin e imagen di un administrado modera den mey di e polarisacion politico na Brasil, el a wordo diagnostica na october di 2019 cu cancer na su stoma, cu despues a afecta su organonan, higra y wesonan.

Aunke e tabata malo, el a sigui cu su funcion na e ciudad cu mas poblacion na Brasil (12.3miyon habitante) y a haci frente na e crisis cu a wordo provoca pa e pandemia di coronavirus, cu a laga casi 29.000 morto na e capital economico di Latino America.

Na augustus di 2020 el a contagia cu coronavirus y despues di su recuperacion, a participa den eleccionnan municipal. El a vence na e di dos buelta, cu casi 60% di e votonan e iskierdista Guilherme Boulos.