(Infobae) – Brasil a registra 2.616 morto den ultimo 24 ora, cu loke ya ta suma 351.334 victima desde cu a wordo notifica, na maart di aña pasa, e prome fayecido na e pais pa coronavirus, diasabra ultimo Gobierno a informa.
Di acuerdo cu un reciente balans di Ministerio di Salud, e pais sur Americano diasabra a pasa 13.4 miyon di contagio ora a suma 71.832 caso den ultimo dia.
Brasil cu su mas di 210 miyon habitante, ta atravesa e pio fase di e pandemia desde cu coronavirus a yega na e pais, poco mas di un aña, y ta sigui como e di dos nacion na mundo cu mayor number di morto y contagio pa virus.
Den ultimo siman a registra dos record nobo di mortonan, ambos cu mas di 4.000 victima, esun mas halto di fayecido pa dia pa covid-19 na henter mundo, actualmente.
A pesar di e cifranan, algun region di e pais como Rio de Janiero, a flexibilisa e medidanan di restriccion y esaki tabata e prome fin di siman, despues cu a wordo cera pa dies dia, den cual barnan, restaurantnan, negoshinan y sitionan turistico a habri nan portanan back pa publico.
No obstante, na luganan na unda ta promove aglomeracion, como beachnan y parkenan, e acceso ta restringi, reglanan cu no a wordo respeta pa varios persona diasabra ultimo den cual nan a opta pa bay lama den e beachnan di Ipanema y Copacabana.
Alcalde di e ciudad, Eduardo Paes, ta confia den e sentido comun di e Brasileronan y diasabra ultimo a haci un yamada pa cu ciudadanonan tin respet pa e normanan, pa usa tapaboca y mantene distanciamento minimo pa evita e plamamento di e virus. Sinembargo, el a alerta cu si e cifranan di morto y contagio ta subi back, restriccionnan lo bin back.
