E ayudo financiero cu e G7 a destina pa combati e candelanan na Amazonia di Brasil ta exclui e aporte di Francia, cu lo bay ta destina pa ‘otro paisnan Amazonico’, e Cancilleria Chileno a precisa.
E aclaracion a yega despues cu Presidente Brasilero, Jair Bolsonaro, a afirma dialuna pasa cu no lo acepta ‘limosna di ningun pais di mundo cu e pretexto di preserva Amazonia’.
Den un comunicado, e Gobierno di Chile a informa cu ‘ya caba ta na Amazonia y na disposicion di e gobierno Brasilero, dos avion AT108 specialisa pa combati candela cu e capacidad di 3.000 liter di awa, ofreci pa Presidente Sebastián Piñera, pa combati e candela na Amazonia’, mientras cu otro ‘lo bay manda dos avion adicional di e mesun caracteristica den proximo dianan’.
E financiamento di recurso pa e mobilisacion aki tabata bin for di e fondonan cu a ser priminti pa G7. Sinembargo, Chile despues a aclara cu ‘e ayudo financiero otorga pa Francia lo bay ta destina pa e otro paisnan di Amazonia cu a solicita esaki’.
Den e sentido ey, e Gobierno di Emmanuel Macron a anuncia cu un ekipo di siguridad civil a bay ayera pa Bolivia. Ta trata di seis militar experto den candela, logistica, transmision y operacion terestre. Un experto aeronautico tambe lo bay uni e siman aki pa e ekipo, cu lo bay ta situa na Santa Cruz.
Gobierno di Bolsonaro somete e ricibimento di e ayudo di e paisnan di e G7 na condicion cu Macron rectifica un declaracion, den cual el a menciona un internacionalisacion posibel di e Amazonia Brasilero, un esencial region pa e ekilibrio di e clima di planeta.
