Segun e autoridadnan Brasileño, e crimen di e concejal y activista Marielle Franco a ser planifica meticulosamente durante tres luna. A identifica e sospechosonan como Ronnie Lessa, oficial di polis retira y Élcio Vieira de Queiroz, polis cu a ser expulsa di e institucion.
“Dos polis a ser aresta pa nan participacion directo y efectivo den e crimen, cu e arestonan aki nos ta cerca di resolve e crimen”, Marcus Vinícius Braga, secretario de polis di estado di Río de Janeiro, a informa ayera.
E investigadonan a señala cu Lessa a tira e balanan cu a caba cu e bida di Franco, y Anderson Pedro Mathias Gomes, e chauffeur di e vehiculo den e cual nan tabata transporta.
Queiroz, ken a ser expulsa di e Polis Militar, ta acusa di ta e chauffeur di e auto den e cual e crimen a ser cometi. Di acuerdo cu e autoridadnan, Lessa a tira e bala desde e asiento patras di e auto.
E hecho a sucede na e nort di Rio de Janeiro, e di dos ciudad mas grandi di Brasil. E investigadonan a descubri cu e crimen a ser prepara durante tres luna, y cu Lessa a haci averiguacion riba internet di e luganan cu e concejal tabata bishita.
Marielle Francisco da Silva, conoci como Marielle Franco, a ser defini como ‘muhe feminista, hende preto y yiu di e favela’.
E sociologo a muri cu 38 aña di edad, e tabata di cinco concejal cu mas voto na e eleccionnan municipal di Rio di Janeiro na 2016.
Franco a gana e reconocemento como activista di defensa di e Derechonan Humano y derechonan di hende muhe, e comunidad LGBT y comunidad di e favela. Tambe a denuncia e abusonan policial na Rio di Janeiro, y pa e cantidad di denuncia, el a ser considera como un strea creciente den e partido iskierdista Socialismo y Libertad.
