Diamars ultimo, un operacion policial a descubri un red di corupcion cu ta opera den districto di Rio de Janeiro y cu por tin relacion cu alcalde di e di dos ciudad mas grandi di Brasil, e influyente pastoor evangelico Marcelo Crivella.
Den un operacion conhunto, agentenan policial Civil y di Fiscalia a cumpli ayera diamars mainta 17 orden pa drenta den diferente luga y asina a haya pruebanan posibel cu tin vinculo cu presidente di e empresa municipal di promocion di turismo (Riotur), Marcelo Alves.
“E ordennan ta resultado di un investigacion cu ta andando pa verifica sospecha di iregularidad relaciona cu empresanan contrata pa alcaldia di Rio de Janeiro”, Fiscalia a splica den un comunicado. Tambe a aclaria cu no por duna mas detaye pa no stroba e proceso hudicial.
E mandato hudicial a bin for di un investigacion conoci como ‘Cuartel General di los sobornos” na alcaldia di Rio de Janeiro, pa verifica e denuncia di Sergio Mizrahy, deteni aña pasa pa su responsabilidad di iregularidadnan cu relacion na Lava Jato, e operacion mayor pa combati corupcion na historia di Brasil.
Den un acuerdo cu Fiscalia na december ultimo pa denuncia su complice a cambio di beneficio hudicial, Mizrahy a denuncia e existencia di un red cu tabata exigi soborno di empresanan interesa pa haya contractnan cu alcaldia di Rio de Janeiro na Gobierno di Crivella, cu a cuminsa su gestion na 2017.
E alcalde di Rio de Janeiro ta aspira pa e reeleccion den eleccionnan municipal di october proximo y p’esey ta negosha apoyo tanto di presidente Brasilero, Jair Bolsonaro, como di gobernador di estado di Rio de Janeiro, Wilson Witzel.
