Gobierno Brasilero a declara emergencia fitosanitario (pa control di plaga) na dos estado di e sur di e pais, pa via di e riesgo cu su cultivonan lo por wordo ataca pa un ‘nubia’ di langosta cu ta na nort di Argentina y cu ta parce lo por avansa den sur di e pais.
E decreto di e Ministerio di Agricultura ta declara e emergencia na estado di Rio Grande do Sul y Santa Catarina, frontera cu Argentina y Uruguay, cu a wordo publica ayera diahuebs pa e Diario oficial di Union.
E medida, cu a drenta na vigor pa un aña, ta permiti pa Gobierno implementa un plan pa elimina e plaga, importa defensa agricola, contrata brigada pa combati e insecto y adopta medidanan di emergencia pa proteha e areanan agricola di ambos estado, cu ta importante pa produci cereal.
E Ministerio a mester anticipa y pone den marcha un plan pa enfrenta e plaga y adopta medidanan di control, despues cu diaranson ultimo a bisa cu tabata “permanece den situacion di alerta”, aunke e prevision inicial ta cu e cantidad di langosta lo avansa pa e sur di Argentina of Uruguay.
Di acuerdo cu e comunicado divulga pa Ministerio, e pronosticonan meteorologico pa region sur di Brasil cu por haya yobidanan y friu, ta “poco probabel” cu e insectonan lo drenta den teritorio Brasilero.
Tambe a aclaria sinembargo cu ya caba nan tabata traha cu medidanan di control den caso cu lo produci otro cambio imprevisto den condicionnan climatico, cu lo faborece e yegada di e plaga na teritorio Brasilero.
