Dialuna pasa, un hues a ordena e confiscacion di bienes di ex-candidado presidencial y ex-gobernador di Sao Paulo, Geraldo Alckmin, presidente di e Partido Social Democracia Brasileño (PSDB), den e marco di un caso den cual e ta acusa di ricibi soborno di e grupo Odebrecht.
Alckmin, un di e candidatonan cu a ser derota pa e ultra-derechista Jair Bolsonaro den e eleccionnan presidencial di october di aña pasa, ta acusa di ricibi di parti e constructor Odebrecht donacionnan no contabilisa pa e campaña den e cual a wordo reeligi como gobernador di Sao Paulo na 2014.
E hues Alberto Alonso Muñoz, titular di dies tres husgado di Hacienda Publico di e estado di Sao Paulo, den contesta di un peticion di e Fiscalia, dialuna pasa a ordena e embargo di 39,7 miyon di real (casi 10,3 miyon di dollar) di bienes di e shete persona acusa den e proceso, fuentenan hudicial a informa.
E decision ta afecta e bienes di Geraldo Alckmin pa un cantidad di 9,9 miyones di real (2,57 miyones di dollar).
Segun e acusacion presenta pa e Fiscalia, Odebrecht, un empresa di construccion grandi na Brasil y protagonista den ultimo aña di varios scandal di corupcion na varios pais, ilegalmente a financia e campaña na 2014 di diferente candidato cu tabata dispuesto pa beneficia e compania cu contractnan di obra publico, entre e cual Geraldo Alckmin ta.
E campaña di e ex-gobernador di Sao Paulo a ricibi 10 miyon di real (2,6 miyones di dollar) den donacionnan no declara, segun e Fiscalia ta bisa.
E recurso duna pa e campañanan ey no a ser registra cerca autoridadnan electoral, ni cu e Fisco pa loke directamente a drenta den boxnan paralelo di e candidatonan beneficia.
Prome, e defensa di Alckmin a bisa cu, cu excepcion di e ‘delegacion premia’ di ehecutivonan di Odebrecht, no ta existi ni un prueba cu e campaña di e candidato a ricibi e recursonan di manera ilegal
