Brasil, un di e paisnan unda ta experimentando e vacuna contra e coronavirus nobo desaroya pa universidad Britanico di Oxford, ta spera cuminsa e produccion masivo na december, diabierna ultimo e laboratorio estatal responsabel a informa.
“Nos ta trahando den dos frente y e prome ta esun di procedura final, cu ta esun di ricibimento di ingrediente farmaceutico activo, e parti concentra di e vacuna cu lo yega frozen. Akinan nos lo realisa e proceso final”, Mauricio Zuma, director di BioManguinhos a señala.
Zuma a detaya cu e proceso final ta consisti den e “formulacion, yena, etiketa, empaketa y control di calidad di e proceso ey, cu ta e prome fase cu nos lo haci desde december”.
BioManguinhos, instituto di produccion di inmunobiológico di Fundación Oswaldo Cruz, centro di investigacion medico principal di Latino America y relaciona cu Ministerio di Salud, lo ricibi tambe, den tur fase, e tecnologia pa e produccion di e vacuna na Rio de Janeiro for di comienso di otro aña.
Di acuerdo cu Zuma, doctor den Gestion di Tecnologia y Innovacion di Universidad di Sussex (Inglaterra), “e proceso final lo ta mas lihe y e produccion di e ingrediente activo concentra lo tuma un tiki mas di tempo”.
E presidente Brasileño, Jair Bolsonaro diahuebs ultimo a anuncia e liberacion di 1.900 miyon real (casi 365,3 miyon dollar) pa henter e proceso di finalisacion di e vacuna importa di Reino Uni y pa e produccion inicial propio, na 2021, di parti di e Fundacion Oswaldo Cruz.
Di 100 miyon dosis adkiri pa Brasil, tin calcula cu na december lo yega 15,2 miyon na december y e mesun cantidad na januari.
