(NLTimes) – Un brasa robotico Hulandes diseña pa asisti astronautanan den espacio exterior a keda acopla e siman aki na e Stacion Espacial Internacional (ISS), segun NASA a confirma den weekend.
E Brasa Robotico Europeo (ERA pa su siglanan na Ingles) a wordo construi pa reduci e cantidad di biaha cu astronauta mester sali pafo di e stacion espacial. E proyecto tabata lidera pa Airbus Defense and Space for di Leiden.
“Durante bida operacional di ERA, e robot ta bay yuda demostra ekipo y tecnologianan clave pa aventuranan espacial den futuro, manera e transferencia robotico di muestra riba Mars”, segun director di Exploracion Humano y Robotico di Agencia Espacial Europeo (ESA), David Parke, a bisa.
Experto aeroespacial, Erik Laan a describi e brasa na NU.nl como ‘un sorto di stick insect cu dos gara.” E brasa di diesun meter di largura tabata acopla na exterior di ISS. “Mientras un gara ta wanta, e otro por los”, Laan a splica. “Door di ripiti e movemento aki, e por haya acceso na puntonan dificil di alcansa y yuda astronautanan cu nan trabao.” E por wordo opera pa e tripulacion tanto paden como pafo di ISS.
A lansa e brasa robotico for di Bajkonoer na Kazakhstan riba dia 21 di juli. Tabatin complicacionnan na caminda pa ISS pa motibo di problemanan cu motor di e modulo Ruso, Nauka, cu a transporta e ERA.
Plan pa construi un brasa robotico pa espacio exterior ya a cuminsa den añanan 1980. Sinembargo, propuestanan a wordo altera un cantidad di biaha, finalmente cabando completamente cu e mision e tempo aya. Na 2012, astronauta Hulandes, Andre Kuipers mester a ricibi e brasa robotico durante su tempo na ISS, pero e areglo aki tampoco a tuma luga.
A inverti alrededor di 360 miyon euro den ERA. Dos tercer parti di e fondonan a bin di Hulanda.
